Blog

الهند من جديد وما أكثر ما تعلمته فى هذا البلد الجميل ولكن قبل الهند ارجع بالذاكره لظروف وجودي هنا

جيت الهند وكنت مهيأ نفسيا لتقبل اي شي فكرياً عقائدياً علمياُ اي شي اي شي كنت قد مررت قبلها بحوالي سنه

بحدث جلل جعلني اعيد تفكيري فى كل شي حتي المسلمات لم يفلت من اعاده التفكير غير إني تشريحاً ذكر !

ضربت بعرض الحائط كل ما تم تلقينه لي عبر الأهل والمجتمع واصبح كل شي يمر أولا على ميزان العقل 

وصلت لمرحله احترم فيها ( ولاازلت ) وجهه نظر المنتحر من شخص هيخش النار حدف لشخص له وجهه نظر فى الحياه وصل لها بعد تفكير

عميق ومن حقه أن نحترم ما إختاره بكامل إرادته الحره .

جيت الهند على آمل اني الاقي فى الفلسفه الشرقيه ماء يملىء ظمئى الفكري بعد ان فرغ من كل الأفكار والمبادىء القديمه

وفعلا لقيت الدنيا هنا مختلفه جدا إتعلمت حاجات كتيره مفيده حابب اذكرها على الاقل لنفسي لمعرفه ما مر بي خلال هذه الفتره الزمنيه

ان الغني والفقير والسياسي الفاسد دول جنسيات مستقله أكبر بكتير من أكبر دوله بها شعب منتسب لها

الشعوب مهما كان مدي ثقافتها وجرأتها لها سقف مينفعش تعديه لازم فيه نظام وطالما فيه نظام فيه فساد

الفقر هو الكنز الأستراتيجي لإي نظام ولازم الدوله حتي لو ديموقراطيه يكون فيه فقرا يدي اصواتهم لناس متستحقاش علشان يعبروا

عن آمال وطموحات النظام وليبقي الفقير فقير ده كنز كبير

اتعلمت إن الواحد مننا مش جاي الدنيا يغير الكون والكلام ده ما هو إلا أحلام يقظه شوفت الناس بتتعامل مع الواقع القاسي

بشكل عملي كدا كل الناس هنا بتسعي وبتشتغل وراضيه ( مقدرش اقول سعيده ) ولكن نظره السخط الموجوده دائما فى وشوش

المصريين مشوفتهاش هنا حتي فى الطبقات الدنيا والشحاتين لازم اتعامل مع الواقع والظروف واحاول اوصل لافضل شي ممكن

مفيش زكي وغبي فيه مجتهد وفي علق ده من أهم القواعد اللى الناس واخداها فى مجال الكمبيوتر بيعملوا اي حاجه بيتعلموها بتاع عشرين مره

حاسسين بواقع المجال واي حد تكلمه يتعامل معاك بشكل كويس مش بيتنططوا على بعض وبيساعدوا بعض من الآخر معندهمش المشاكل النفسيه بتاعتنا

النظر دائماا للنتائج هنا بيتجاهلوا بعض وهما فى الشارع ومحدش هيقف يقولك انت بتعمل ايه ولا لابس ايه ولا اي حاجه الا لو انت وقفته طلبت منه حاجه

كنت فى الاتوبيس مره وبتاع اربع شباب عمالين يضحكوا وصوتهم عالي جدا وكنت عايز اقولهم اخرسوا بس لقيت الاتوبيس كله ساكت

وبعد شويه هما سكتوا 

ايه الفرق بين اني كنت هقولهم اخرسوا وانهم يسكتوا لوحدهم ولا حاجه

كدا كدا شويه زعيق وهيسكتوا وده شي هما بيطبقوه فى كل حاجه متلاقيش أبدا حد بيعمل فعل معين نتيجه الفعل ده زي عدمه مستحيل

علاقتهم بالمرأه هنا علمتني حاجات كتير عرفت ان المرأه فعلا نص المجتمع مش الكلام الخايب بتاع مصر لا حقيقي هنا الست شغاله فى كل مكان

مفيش حقوق مرأه في حقوق إنسان هيا إنسان زيها زي الراجل بالظبط موجوده فى الشرطه فى الوظايف الحكوميه فى كل مكان

اكتشفت مؤخراً ان المرأه ممكن يكون لها طموحات أكبر من إنها تربي العيال وتستني البيه يجي من الشغل وتاخد منه المصروف !

بدأت اشوف ان المرأه فيه طرق تواصل معاها غير السرير وإنها ممكن تكون زيي وأحسن مني علمياً وثقافياً وفى كل شي

ميفرقش الرجل عن المرأه غير فارق تشريحي بسيط تطور للتكاثر فقط لكن هي تملك عقل وتفكير ومنطق زي الرجاله بالظبط

وبعدت عن فكره مراتك ملك لك وتوصلت ان الزوجه شريك فى الحياه من حقها تختار شكل مستقبلها يكون عامل ازاى ومش من المفروض

انها يتفرض عليها تربي العيال وتضيع عمرها معاهم !!

نظرتي لنفسي اتغيرت انا مش الكائن الجامد سيد الكون فى الحقيقه انا ولا حاجه الارض كوكب من كام مليار كوكب شبها فى مجره التبانه

اللى هيا كمان مجره من كام مليار مجره فى كون كبير لا يعبأ بنا البته أبداً أبداً أبداً

تشريح الإنسان احنا شويه خلايا فيه منها 70% ميكروبات بتستخدمنا لوكانده وماشين بمبدأ الأرض مقابل السلام

زال ازدرائى للكائنات الحيه الاخري واصحبت اشوف إننا كلنا فى مركب وحده وكلنا لنا الحق فى الحياه

مش شايف انه من حقي اقضي على حياه كائن حي لمجرد اني اقدر على كدا والا المفروض استصيغ ده لما طاغيه ينهي حياه آلاف البشر بقنبله مثلاً

مفيش حق مطلق ومفيش طرف معين يملك الحقيقه والباقي بهايم الحقيقه دايما نسبيه مش لازم علشان انا صح تكون غلط والعكس صحيح مفيش أحسن طريقه للعيشه ولا فيه اني طريقتك احسن من طريقتي إحنا مختلفين جدا عن بعض المناسب لي ممكن يكون مستحيل لك وهكذا والغرض من الحياه إنك تكون سعيد وأساس الأخلاق إنك متإذيش الناس والتدرج فى تعامل الناس يختلف من شخصيه لشخصيه من اول اني امنع عنك كلمه تضايقك الحب
حبو بعض

اكتشفت اني اتولدت فى بلد المجتمع بتاعها قاسي بشكل فج احنا مجتمع فيه فقير وغني

احنا كفقرا قاسيين على بعضنا اوي بنضايق بعض بنخلي الحياه أسوا ومش لاقي سبب لكدا

عيد سعيد